40. காந்தக் காதல்.

                                                                          Photo:-   Thank you A.vikatan.

காந்தக் காதல்.

வாலிப வாசலின் வனப்புத் தென்றல்

வாலிபக் காதலாம் வசந்தச் சுகந்தம்.

வாலிபம் தொலைந்தாலும் வாசனை வீசும்.

வாலாயமாகும் வசீகரக் காதல்.

ஆடா மனிதனையும் ஆட்டும் மந்திரம்.

காடாக்கி வாழ்வைக் களவாடும் எந்திரம்.

வாடாமல்லிகையாய் வாசமில்லாப் போலியுமாகும்.

தேடா சுகமாய் வாகையும் வீசும்.

இதயத்துள் சொல்லாமற் கொள்ளாமல் வருமாம்.

இதயத்துள் புகுந்திட்டாலிமை தூங்காதாம்.

இதயம் கொடுத்திதயம் மாற்றுமாம்.

இதயம் கவர் பண்டமாற்று காதலாம்.

காதலென்றும் கசக்குமென்பவன்

காதல் வாழ்வின் கருப்பொருள் கண்டால்,

காதலைக் காந்தமாய் கையிற் கொள்வான்.

காதலைக் கடவுளாய் கருதியேற்பான்.

பார்த்திட எண்ணினால் குலம், குணம்

பார்க்காது. மன்னர், மனிதர் பேதமற்றும்

பார்த்ததும் ரசனையின் விருப்பு நேசமாகும்.

பார்த்திட்ட கணமே காதல் கனியும்.

வானவில் லல்ல  வாழ்வின் காதல்.

வானத்து நிலவாய் வாழ்விலொளிரும்.

வானம், நிலா, இயற்கை போன்றது

வானமுள்ள வரை வாழும் காதல்.

பா ஆக்கம் வேதா. இலங்காதிலகம்.

ஓகுஸ், டென்மார்க்.

9-7-2012.

(எந்திரம்- மந்திர சக்கரம்)