331. இது உனக்கு மட்டுமல்ல

இது உனக்கு மட்டுமல்ல

பொதுமைச் சொத்து உலகில்
மதுரமாக ஏராளம் ஏராளம்
மதுவமாம் மதுரசத் தமிழ்
மதுகைப் புயலாகும் திறமை
ஒதுக்காத அரும் முயற்சி
முதுமை வழமைக் கனி.

பதுக்க முடியாது உனக்கென்று
புதுமை! இதை மறந்தால்
கேதுவாய்ச் சுற்றும் கருவம்
முதுகாட்டு மனம் இதை
மெதுவாகவும் ஏற்காது! வதை!
ததும்பும் அறிவுள்ளமிதை மகிழ்ந்தேற்கும்.

(மதுரம் -இனிமையாக. மதுவம் -தேன், கள். மதுரசம் – கரும்பு, சாராயம் இன்னும் பல. மதுகை – அறிவு, வலிமை. முதுகாட்டு – பழங்காடு, சுடுகாடு.)

வேதா. இலங்காதிலகம்.
டென்மார்க்.
30-8-2014

 

தமிழ் என்றால், திறமை என்றால் சிலர் நினைக்கிறார்கள் அது தங்களிற்கு மட்டும் தான் சொந்தமென்று.
ஏதோ மற்றவர்கள் எல்லாம் தங்கள் கால் தூசி என்கிற மாதிரி சிந்திக்கிறார்கள்.
தங்களிற்குத் தான் எல்லாம் தெரியும் , தங்களால் தான் எல்லாம் முடியுமென்று ஒரு நினைவு.
அது பொய்யான எண்ணம்! மாயை!.
நிறையத் திறமைசாலிகள் உலகம் முழுதும் நிறைந்துள்ளனர்.
அதை மதிக்கக் கற்றுக் கொள்ள வேண்டும்.
ஒவ்வொரு வரும் திறமைசாலிகளே ஒவ்வோரு வகையில் என்பதை மறத்தல் அழகல்ல.