329. மாதிரிப் படவழகியே! (மாடல்)

தீபாவளித் திருநாளை முன்னிட்டு
ரூபன்&யாழ்பாவாணன் இணைந்து நடாத்தும்
உலகம் தழுவிய மாபெரும் கவிதைப் போட்டி-2014

1. படத்திற்கு வரிகள்:-

மாதிரிப் படவழகியே! (மாடல்)

ஓரத்திலமர்ந்து ஒய்யாரம் காட்டும்
ஓவியமோவிது உயிரோவியமோ வென
ஓப்பனை ஏமாற்றும் உருவிது

திருவுருவான திருப்பாவையிவள்
திருமதியோ செல்வியோ ஒரு
திருமாங்கல்யமும் தென்படலையே!

பூக்கூடை கையேந்தி வாயிலிலே
பூத்திருக்கும் விழியழகி யாருக்கோ
பூரிக்கிறாளா காஞ்சிப் பட்டுடுத்தி!

நிழற்பட மாதிரி  இவளோ!
நிசக் காதலியோ! கருத்தாய்
நின்றிடும் தோரணை காதலனுக்காகவோ!

பூக்காரியும் இவளில்லை! ஏழைமைப்
பூஞ்சணமும் இவளில் இல்லை
பூஞ்சிட்டிவளொரு மாதிரிப் படவழகி.

பளபளக்கும் இவளுருப் போன்று
பளபளக்கும் பின்னணியும் இல்லை
வளவளப்பு ஏனிவள் மாதிரிப்படவழகியே!

பா ஆக்கம் வேதா. இலங்காதிலகம்.
டென்மார்க்.
14-8-2014

2. கவிதை – விருப்புத் தலைப்பு

விரைந்து வருவானோ!

மலர் மணம் சூழ் நந்தவனத்தில்
மகிழ் குளிர் குடைநிழற் கீழ்
மேகமிடு வில்லின் அழகின் கீழ்
தாகம் தணியச் சாரலில் நனைந்தேன்.

ஈரமுலர சந்திரனை ஏனோ காணேன்
ஈகையாளன் என்னவனையும் காணேன்
ஈரப்பற்றென் மேல் உலர்ந்ததோ அறியேன்.
ஈடுபாடு குறையாக் காதலோடு காத்துள்ளேன்.

மின்னல் கூறுவ தென்னவாயினு மவன்
இன்னலற்று வரும் பாதை காட்டட்டும்.
மின்னும் மூக்குத்தி நினைவு வந்துடன்
மின்னலாய் வந்திடானோ மிகச் சேதியறிய.

மலர் மணம் விரிக்கத் தன்
மனை நினைவு சிரிக்க இவன்
மலரேந்தி வருவானோ, இன்று என்
மனம் மகிழச் செய்வானோ விரைவாக.

நீளும் வாழ்வில் என்னைத் தமிழ்
ஆளும் திறன் போன்று மகிழ்
பெருக்கி  ஆள அவன் வரும்
தருணம் நெருங்கி வரட்டும். வரட்டும்.

பா ஆக்கம் வேதா. இலங்காதிலகம்.
டென்மார்க்.
14-8-2014